Kurzgeschichte "is oS"

 

is oS

Auch zum anhören.

is oS
Iech waeß nuch genau woß dess vurre Aufreeching woahr.
Die zwee Buchschtoom, iech sooch eich schpetr wos die vurre Bedeiting hamm, sei im ganzn Vochtland beriemt wurn.
Mier warrn sue 14-15 Goohr alt, also im 1970, und kunntn oder mußtn ab itze bi de Juniorn in Beereid mietschpieln.
Dess wor e ganz schiene Imschtelling.
Iech koe eich soong, daß dess ganz grueße Draehml warrn, gehng die mier nu itze schpieln mußtn.
Mier warrn zwar aenet klae und schmaechtich, abr Schpundis hattn murr scho. Unnere Juniorn, die ball alturschhalbr nei de Maennrmannschaftn kumme sei, warrn durr Lix, durr Klaus und durr Inga und wie se net alle gehissn hamm.
Ne Dinnstich mit de Maennr odr ne Dannerschtich woahr Traening und Sunntichs warrn de Punktschpiele.
Bi de Schielr warrn mier de Grueßn und hattn is Soong; itze warrn mier wiedr de klaenn und hattn dinn durr Kabine nischt ze piepsn.
Mier kunntn abr durch e guts Schpiel dueme Schportplatz iebrzeing.
Sue schlecht warrn mier naehmlich net.
Dr Lutz, dr Frank, dr Dieter und dr Herbert warrn alle sue alt wie iech und warrn nei de Beereidr Juniorn aufgeruckt.
Nu itze hatt sich dess emoll zugetroong, daß de Grueßn sich anneren Dannerschtich vurabreed hamm, ne Sunnumd nei durr Eiche in Hintrhae ze Tanz ze giehe.
De Eiche is heitzetooch e ganz gutr Freßtempl, abr dozemoll hatt‘s net ne bestn Ruf.
Sunnumds wenn Tanz wor goengs echol huech her.
De grueßn Juniornschpielr hamm ae echol eweng getuschlt, wenn se vurr durr Eiche unterenannr durrzehlt hamm.
Wenn die weißkriecht hamm, daß mier zuhern woahr allemol imsdenkn Ruh.
Nu kenntr eich vierschtelln, daß mier immr neigierichr wurn sei, wos nu duntn dere Eiche lues woahr.
Wu mier nooch sue 16 Gohr alt warrn, hamm se mol rausgeruckt.
Mier kenntn ja ae mol miet none Hinterhae ze Tanz giehe.
Bild eich abr net ei, daß iehr eich be uns miet noene Tisch setzn kennt, hotts gehissn.
Des woahr halt dorther sue.
Alle die in maen Altr warrn, hattn ausgemacht, daß mier ne Sunnumd nohne Hintrhae nei durr Eiche ze Tanz genne.
Is erschte mol nei durr Eiche, sue Begehmheit.
Den Dannerschtich durvor, bin Imziehe, hamm de Grueßn wiedr sue leise untrenannr getuschlt.
Durr Lutz glaeb iech, waeß dess abr nimmer genau, hat gehaert daß do ae Maedle nei durr Eiche ze Tanz genne, die dinn durr linkn Hand zwee Buchschtoom schtiehe haettn.
Is hott nimmr arch lang gedaurt, nooch sei mier aufgeklaert wurn.
Unterm abselutn Mantl durr Vurrschwiegnheit hamm uns de Grueßn durrzehlt, daß es duntn durr Eiche ze Tanz Maedle gibbt, die dinn durr linkn Hand oS schtiehe hamm.
Nu itze is de Schpanning bis zinn zurreißn gewehn.
Mier wottn freilich wissen, wos die zwee Buchschtoom dinn durr linkn Hand ze bedeitn hamm.
Mier sei aufgeklaert wuhrn, daß dess ohne Schlipfr bedeitn dett.
Iech glaeb ae nuch in den Altr sei mier bis hintr de Ohrn ruet wurn.
Leckt miech fett, eppr desweeng woahr de Eiche sue vurrufn.
Mier sei ne Sunnumd none Hintrhae geloffn und net mit de Motorredr gefohrn.
Wos dess vurre Beweechgrind dozemoll warrn, dess waeß iech heit nimmr.
Pinktlich im sechse, wie ieblich, kunntn murr nei.
Im sieme goeng durr Tanz lueß.
Wos do sellmol vurre Kapell Musik gemacht hot, dess waeß iech heit ae nimmer.
Durr Soel wor gerammlt voll.
Mier hattn scho in Platz kriecht, waell ae Hintrhaenr Gunge in Beereid miet Fußball geschpielt hamm. Die hattn vurr uns Platz gehaltn.
Nu itze goengs lues.
Ich koe miech nuch genau droe durrinnrn, wie wenn‘s gestrn wor.
Iss warrn beschtimmt viel schiene gunge Maedle ze Tanz an den Ohmd.
Mier hamm abr doch kaenr neine Gesicht geguckt, nae naer auf de linkn Haend.
In vurrschiedene Abschnitt dinn den Soel hattn murr uns aufgetaelt imm emende arch effektiev ze sei.
Iech glaeb is wor kae Maedl dinn denn Soel, dere mier net nei durr linkn Hand geguckt hamm.
Bi kaenn Maedl hott aenr vurr uns oS entdeckt, abr wirklich be gor kaenr.
Und wenn doch; wie sottn mier denn des iebrpriefn?
Ze gutr letzt hammr scho gesehe, daß de grueßn Beereidr Juniorn echol meh gefeixt hamm.
Nu ja, ne annrn Tooch woahr Punktschpiel durhaemm gehng Kottngrie.
Bin Imziehe dinn durr Kabiene hamm die Grueßn siech ball tuetgelacht, waell se uns sue richtich vurrorscht hattn.
Freilich warrn mier schtink saur und beleidicht.
Die Sach mit den oS is nuch lang durrzehlt wurn.
Manniche behauptn heit nuch, daß des tatsächlich fei ae gehm hot.
Wu mier nooch de Grueßn bi de Beereidr Juniorn warrn, hamm mier de neie Gunge
genau sue vurrorscht.
De ganz grueße Schpanning wor abr langeweng naus.
De Beereidr sei nimmr sue arch nei durr Eiche ze Tanz gange.
Mier sei liebr naus durr Hammrbrick odr nausn Tannbaerch gange, ohne oS.
Und aemoll vurr Hammrbrick haemmzu hattn murr in Zwist mit ne Hammerbricknur Schandarm.

Obbr dess iss nu wiedr e annersch Geschichtl.


Michael Stieber
12/2023

• Alle Bilder sind urheberechtlich geschützt, dürfen weder vollständig oder auszugsweise kopiert oder vervielfältigt werden.